用使命感去說說這讓我感動的Music Server

shell9999

(出處: Hiendy.com 影音俱樂部)

https://www.bilibili.com/video/BV1du411a7xG/

將近3-4年無寫過包膠，主因係試過嘅野覺得無咩值得寫，亦都無咩大嘅改變！記得對上一次出post好似係問有咩Streamer or Digital Transport介紹。主要原因當然係希望將個Source玩到最好。而除左digital部份，期間當然趁著新興市場紙水低迷嘅機會，亦都玩過好多後級，前級，線材...呢D全部都係燒銀紙嘅欣物啦！不過今日主要唔係想分享呢D！

前文所述呢2-3年都係搵緊streamer呢一類嘅產品，期間就一路用住部RS150，呢度其實唔係話RS150有幾好，只係因為我好鐘意用佢YOUTUBE嘅功能，去睇世界上唔同地方off market嘅演出，咁佢又真係唔係太差wor所以留住用。（不過直到RS130出咗之後，成件事就有比較啦，淨係可以接10MHz clock就已經好大分別，因此宜家已經轉會RS130）

事實上呢2-3年裡面借嘅，買嘅，呃嘅，拐帶嘅 Music Server，Streamer 不少於10部，咩ABCDE牌.....到好貴嘅T牌都有試過或AB過，結果都係出出入入，最後無一留底，無法滿足。所以一直都只係用一部土炮server keep 住d file 加埋 部RS150去出征就算！（以上討論嘅只係Digital 輸出部份）

但係直到有一日我無意中碌到呢一條片：

https://www.bilibili.com/video/BV1du411a7xG/

聽到入面有部嘢同部DCS CDP疑似AB比較，我即刻好好奇，好想問下樓主呢條片係唔係教人：“如何在剪片時大幅優化音效輸出” or “如何進行現場收音”？如果係嘅話，就直接媽叉佢，鬧鬼佢話佢會誤導我地D HiFi友，以為DCS輸咗俾你......架嗎！

上面講嘅野都係認真嘅，我當時反復聽過10次以上，最後搵呢部嘢出嚟，嘗試詳細睇下佢咩料先。但係係FB度見到嘅只係得兩樣嘢，就係一D用家嘅短片，同埋一堆睇唔明嘅技術文章。裡面我自己最記得嘅就係佢一路強調佢部機嘅南北橋時鐘係自己設計嘅，仲有咩ATX 分電壓線性電源.......對於呢D嘢我依然只能用一條鐵嘅視角去仰望佢, 真係唔知佢講乜.....哈哈！（不過後面知道原來好犯本嘅設計。）

期後嘗試PM接觸店主Vin sir（即係我叫佢Vin神嘅Vincent）！打算理解下部機嘅底細。個人向來對於PC base嘅嘢都麻麻，所以開先都有D hesitation，不過打算即管問下先啦。結果得返嚟嘅好多好詳細嘅解釋，我地互相分享聽HiFi嘅經驗，理解到點解宜家嘅transport, server都仲係撇唔甩D數碼聲，又理解到往後數碼發展可以點樣超越宜家，甚至去到Reel 同 Vinyl嘅水平.......

講完一大堆，其實都唔係驅使我去課金嘅最主要原因，最主要原因係Vin神透露佢呢個架構嘅配置只有出現係某1-2部6位數嘅機裡面，而佢嘅設計都係係呢1-2部6位數機嘅層面上去超越佢地嘅，而且全部都係佢地自己一手一腳從零設計開始，唔係買公板做出嚟嘅。講真，呢一句真係Hit到我呢D Cheap友嘅靈魂，念住係唔係真係好過“個部“好多呀？（“個部”我係聽過嘅，不過就唔開名啦）去到呢度，唉......死就死啦，念住輸極有個普！買啦！（呢D心態係唔係好有共鳴呢？.....哈哈）Anyway，店主全程都無導過我去俾錢嘅，只係我自己搏一搏，念住係唔係可以單車變摩托！

上面嘅係“前事提要“，後面係我嘅個人感受，慎入！寫呢一篇文章，正如標題所說，係帶有使命感嘅！自己唔想鋪陳太多呢部機點好點好，自己唔鐘意做“善稿”式嘅分享，所以聽後感唔會好詳細！我想分享嘅係，其實呢個年頭做HiFi並唔係容易嘅事，玩得HiFi嘅，大家見到都係我地呢D白頭年紀，主流玩貴嘢嘅人都係40以上，其實個Market並唔係太大。而大陸市場大，但係串流又未係主力，加上經濟都麻麻地，實際都唔係容易。所以見到Vin神佢地咁有heart去做呢部咁“難度高”嘅server，都俾佢感動到。

而且佢呢個人係一個Fundamental級別嘅技術人才，佢答你嘅問題係從個根本去陳述，即係唔係話俾你聽，你買部機返去煲咗1000粒鐘之後去問個Sales點解唔好聲，個sales會同你講你未煲夠，然後話當你煲到佢唔著機個下就最好聲啦！一係叫你換咗200條線先，咁你就會試到好聲啦！呢D嘢真係聽到都想“發脾四“。而係同Vin神嘅溝通當中，佢係會係部機嘅設計上開始講俾我聽，點解呢D出名嘅機根本唔會好聲，而個問題係邊度，係因為邊D位置嘅訊號處理得唔好，所以點搞外圍都唔會好聲！呢D答案，真係唔係個個人都肯話你知，縱然肯話你知，亦都唔肯定佢識唔識！

係多次嘅溝通當中，佢都不厭其煩咁解答我嘅問題，就算我科咗水之後，佢都主動聯繫我，話幫我upgrade 2次，一次係幫我upgrade機內接線 同埋upgrade 光纖LAN，另一次係遙距幫我優化機內OS，兩次嘅處理都非常貼心，亦都有唔錯嘅提升！而寫呢篇分享嘅起源，其實主要係因為睇到佢D 資料裡面有好多顧客嘅留言都係國內用家，所以突然腦內充血，覺得應該為呢個本地品牌同佢嘅founder留下屬於本地用家嘅“片言真字“，寫出自己整個從認知品牌到成為“粉絲”嘅過程，以免係佢嘅發跡地最後出現留白！

廢話少說，簡單講下呢部機俾我嘅第一個印象 ~ “驚為天人”。我原先係用一部土炮Server + RS150 Roon去咗source，當買咗呢部新server之後，就嘗試直接USB輸出去聽，單純試下function咁解，無咩特別處理，同埋轉移埋個roon過去。就係呢一個步驟，我竟然當晚就聽咗5-6個鐘頭歌，係有一種唔能夠停落嚟嘅感覺！

當一開聲嘅時候原本熟悉嘅管風琴，小提琴，double bass，全部好似揭開咗一層面紗咁，重新呈現係我面前。原本嘅聲效始終係有鋸齒感覺，密度同立體感都覺得唔夠好。但係就咁只係輕輕接上呢部新嘅server用USB出，所有以前熟識嘢突然好似換咗新裝咁，明朗曬靚曬！即係簡單D講，就好似男人睇有格AV，突然變咗無格咁樣！清晰分明，層次凸顯！而呢種改變係我對上買過，聽過，借過，拐帶過嘅任何一部機都俾唔到我嘅！如果去形容呢個差別，只有四個字 ~ “非常巨大”！

個晚就係因為呢個impressive嘅開始，就令到我好有興趣去挖掘佢去演繹自己以前聽開嘅歌有咩唔同，原來我發現，以前嘅組合係聽少咗好多嘢，同埋D定位擺位嘅規模都係比較細，用新server播出之後明顯改善好多！之後我做咗一件事，我搵D我認為最難播得好嘅歌出嚟播下，睇下咩玩法？

哈哈，可能你會以為我梗係攞D咩特別版本嘅貝九，太鼓呢D“試卷”出嚟考機，如果大家真係咁唸，就可能會失望啦！其實我自己覺得，一向好難播得好聽嘅都係D以前嘅時代曲，（係原版嘅Canto Pop，唔係口水歌，小弟唔聽口水歌嘅）呢度好多原因，首先D人唱得衰，然後錄音衰，Mixing就更加衰！所以基本上香港流行歌好少真係好好聲，不過我地唔可以因為佢地唔係HiFi Standard，就抹殺咗佢地係我地人生嘅重要性，我地呢一輩無論點都好 愛在深秋，每天愛你多一些，李香蘭，友情歲月，一起走過的日子，夜半小夜曲，風繼續吹，夕陽之歌。。。呢D歌你唔鐘意聽都好，但係都會聽過。即係鬼佬有Oldies，有ABBA, 有木匠，有批頭四可以做經典，咁香港時代曲都一樣可以有Classic，最少佢都係我地人生幾重要嘅一部份，甚至可以話係一代嘅回憶！你睇宜家華為都走去玩“光輝歲月”啦！

偉論完畢，講返正題。呢部Server當時播D HiFi歌對佢第一個感覺已經相當唔錯。但係當佢播時代曲嘅時候，就真係有 ~ “驚為天人” ~ 嘅分別！流行曲，好多都好平面，大聲D嘅話人聲就俾其他音樂蓋過曬，D Mixiing真係差到不得了，豪無立體感可言！但係好神奇地，有部份嘅名歌手歌曲，好似四大天王咁，呢部server播出嚟嘅效果竟然可以聽到有立體感，雖然有部份歌曲都係因為Mixing衰無得解救。但係唔少嘅歌會變得有立體感，人聲行前咗，背景音樂可以分離到！而且D毛糙咁少咗，同埋線條嘴型呢D嘅改善係最大嘅！

其中一隻碟印象好深刻，就係2011年鄭伊健嘅演唱會，鄭伊健嘅唱功就大家都道“能夠有幾好啦”，但係好鬼衰地，佢D歌又真係唔少K歌代表，旋律又幾好聽嘅！咁個日就播咗一首佢同謝安琪合唱嘅“一個甘願為你蹈火海的人”。

哇。。。一開聲，第一次聽到咁有感覺嘅“replay”，當時嘅感覺唔係好唔好聽，而係佢所演繹出嘅一種感覺，係有溫度唔冰冷嘅一種moody，好感動！呢首歌一開聲係Kay嘅清唱，我完全可以感覺到佢個嘴型配合運氣嘅變化，好似佢企咗係我面前一樣。（呢一cut 係Live演唱會，唔係口水歌）唔係得佢把聲，係連當時佢身體嘅郁動對空氣嘅改變，都能被夠感覺到，所以我嘅描述係感覺到佢企咗係我面前，係有型態嘅！係咪好誇張？？係....我都覺得，但係真係咁誇張！

聽完呢首歌一次之後，我就做多一個舉動，用RS150 直接direct Lan接上呢部server度，RS150唔經過switch，直入Server。呢個係Vin神最推薦嘅玩法，佢話提升會好大。做完呢個動作之後，再聽一次頭先謝安琪同鄭伊健個首歌，呢一次直接將我嚇倒，因為個密度提升好多，如果一定要我評價，我覺得係介乎CD同黑膠之間，佢已經超越CD嘅層面。（其實我睇到好多國內對佢呢部server嘅評論都係咁。個日我聽到之後，我係認同嘅，好大程度上真係做到。）

At least呢種密度嘅輸出，暫時係我聽過嘅CAS系統未出現過嘅。唔....我唔排除市面上有機做到嘅，但係如果對比只係咁簡單嘅鏈接就出到呢個效果，我覺得已經非常厲害。呢一個接法當時向我展示咗一個好深印象嘅效果，就係當謝安琪清唱完之後，我係感覺到鄭伊健嘅移動，然後到佢開聲唱歌時，佢嘅聲帶可能當時狀態唔係幾好，係有D痰上頸聲沙狀態嘅！而就係因為咁，係今次嘅播放中，我竟然可以聽到佢聲帶上個種“Kick 住 Kick”然後變返順嘅鏈接變化.....整體非常非常立體！亦都因為咁。。。我選擇將呢隻CD係Tidal度一刀不剪咁，由頭播到尾，一晚聽曬呢隻LIVE，感覺非常非常開心！隨後嘅日子，宜家都聽多返好多以前嘅時代曲，搵返自己嘅青春！一部播得好時代曲嘅HiFi，原來除左可以伺候好我地嘅耳仔之外，仲可以幫我地沉醉係往日嘅回憶之中！難得！

期後再做咗頭先講嘅2次升級，效果都非常正面，其中一次係改為行全光纖LAN，呢個改善係更為清晰，分離度更好。但係呢樣嘢都搞到我要買多部Switch，同埋我宜家買咗RS130，剛好佢宜家可以用SPF，咁都可以做到Direct 光纖Lan, 不過到宜家佢個ROON cert都未搞掂，即係我宜家都未能夠播到完全體！我自己認為，如果RS130都可以行到Roon嘅時候，個提升還會極之大，因為RS150接上去之後已經提升好大，而RS130俾RS150係好極之多，所以確實有所期待呢個完全體嘅玩法。希望Roon快D做嘢啦，好心急呀！大佬!

好啦，今次嘅分享就寫到呢度啦，之後唔知道幾時先再有產品會觸發到自己寫文分享嘅熱情啦。最後係下面幫佢賣少少廣告（佢地唔知嘅），分享下VV Audio嘅網址同FB，而呢部Server個名最新叫做 Vanadium Music Server，有興趣嘅Ching可以去睇下，佢嘅水平係直奔6位數嘅機種之上，值得觀摩下。

Web：www.vvaudiolab.com






补充内容 (2023-10-2 21:24):
簡介

【飞天国庆特别节目:石破天惊的精通数播，一款ATX多路供电的roon core】 https://www.bilibili.com/video/B ... a0f67af42ad1571720f

yaofei

能不能翻译成汉语？

lvl

yaofei 发表于 2023-10-2 21:17
能不能翻译成汉语？

枪文

vendetta

港仔写文章的大多是自己有卖或姘头有在卖.通便看看就好.